تدري على كثر حبك لي يحسدونـي
وادري على كثر حبي لك يحسدونك
لأنهم يشوفون زولك داخل عيونـي
ولأنهم يشوفون زولي داخل عيونك
ولأنهم يعرفون بي اصبحت مفتوني
ولأنهم يعرفون بك اصبحت مفتونك
ولأنهم يعرفون مالك عيش من دوني
ولأنهم يعرفون مالي عيش من دونك
يعني بصحيح العباره صرت مجنوني
وانا بصحيح العباره صرت مجنونك
كنهم من اموالهم بالغصب يعطونـي
وكنهم من اموالهم بالغصب يعطونك
لو هو بيديهم ذحاح السم يسقونـي
ولو اقدروا من ذحاح السم يسقونك
جاني العواذل مسى البارح يعذلوني
عنك .. ولا بد في غيابي يعذلونـك
بفراقنـا يعرفـون انهـم يهدونـي
وبالبعد عني دروا انهـم يهدونـك
والله لو حاولـوا عنـك يصدونـي
ماصد عنك .. وبالـك لا يصدونـك
وان حاولوا عن مجيي لك يردونـي
باجي وعمري ببيعه لـو يردونـك
تدري وانا ادري بحبك لي يحسدوني
وادري وتدري بحبي لك يحسدونـك
