تقاليد

ياونتي ضاق بصداها فضاء البيد
ضاق بصداها برها مع بحرها
ولا ينفع المشتاق كثر التناهيد
واللي درى عن ماب حالي عذرها
وياهل الهوى مال الهوى طب ومفيد
للي عيونه تشتكي من سهرها
أنا بليت بحب مركوزة الجيد
عمهوجة كن القمر في نحرها
يردني عنها الحياء والمناقيد
وشربت من ظيم الليال وكدرها
تجملوا برسالتي يا الأجاويد
للي عليه الحال قرب خطرها
أنا بعيد وصاحبي عني بعيد
ولو المسافة مشكلة لختصرها
من دونه العادات هي والتقاليد
وعليه حالي قام يذبل زهرها
ياتل قلبي تل غرب المعاويد
عليك يانور الديار وقمرها
عليك يالمجمول من جملة الغيد
متى عيوني منك تملا نظرها



للشاعر :نايف قزعان الحويماني


وشكراً